Verð á silungsveiðileyfum

Í 21 ár hef ég farið til silungsveiða í Laxá í Mývatnssveit. Stundum allt að 4 sinnum á sumri. Það lýsir hugarfari veiðimanns. Nú árið 2008 hefur Veiðfélag Laxár og Krákár ákveðið að reyna að fá meira fyrir sinn snúð og boðið ána út. Og hverjir haldið þið svo að hafi tekið ána á leigu? Jú, auðvitað Stangveiðifélag Reykjavíkur. Og hvað mun svo dagurinn kosta árið 2009? kr. 21.800 - 28.900 fyrir utan gistingu og fæði.

Og hverjar eru svo líkurnar á einhverri veiði? Með mikilli vinnu, erfiði og ástundun er möguleiki á að fá einn til tvo 4-6 punda fiska ef heppnin er með og svo slatta af 1-3ja punda fiskum. En er aflinn þess virði? Í ágúst s.l. fór ég norður og veiðin var slök, lítið um vænan fisk og frekar dapurt ástand. Að þeirri ferð lokinni og vegna frétta um fyrirhugaða leigu til SVFR þá sendi ég veiðifélaginu bréf þar sem ég lýsti því yfir að verð á veiðileyfum í Laxá væri komið að skynsamlegum efri mörkum og ef hækkanir yrðu næsta sumar þá þakkaði ég félaginu fyrir meira en 20 ára viðskipti. Ég mun ekki greiða 21-29 þúsund krónur fyrir að renna fyrir þessa fiska, með lítinn kvóta í ofanálag. Ég ætla að kaupa mér veiðikortið á kr. 6.000 og skutlast í nokkur vötn.

Sá aðili sem séð hefur um úthlutun leyfa og reksturinn á batteríinu er snillingur en það er Hólmfríður Jónsdóttir á Arnaratni. Bara hún var c.a. 1/3 af þeirri upplifun að veiða á svæðinu. Sú upplifun rýrnar all verulega ef hún hverfur á brott.

Og svo byrja forsvarsmenn SVFR að væla nú þegar kreppan er skollin á. Ekki dettur mér í huga að vorkenna þeim fyrir fyllirí síðustu ára.